Plaza Biziberritzen

COVID-19ak sekulako eragina izan du bertso plazan; hala, Bertsozale Elkarteak saioak bultzatzen jarriko du indarra.

Bat-batean kantuan aritzera ohituak, baina ez bat-bateko etenera. 2020ko martxoan, bertso plaza kolpetik gelditu zen COVID-19aren pandemiaren ondorioz. Hurrengo hilabeteetan egoera bera zein arauak aldatzen joan dira, eta sasoi bakoitzean itxura bat edo beste hartu du plazak: une batean ere ez lehen zeukana, ordea.

Kulturgintza, bertsolaritza, zaleak aurrez aurre elkartzetik bizi da neurri handi batean; osasun krisiak kolpetik eten zituen zuzeneko emanaldiak eta bertso plaza martxoan. Pandemia hasi zenetik egoera pixkanaka hobetu bada ere, gaur egun - 2020ko iraila-, lehengo bertso plaza kopuruaren %25 egiten da soilik.

Bilakaera izan du bertso plazak hilabeteotan:

  • Martxoaren 13an izan zen etena. Ordutik maiatzera arteko saio guztiak ezerezean geratu ziren. Etenaldi horren ondoren, bat-bateko online bertso saioak eskaintzen hasi ziren bertsolari batzuk etxetik, musutruk.
  • Maiatzaren hasieran, oraindik ere zaleak ezin elkartuta, Bertsozale Elkartea eta Lanku Kultur Zerbitzuak, elkarlanean, Amasa-Villabonako Subijana etxean bertso saioak grabatzen hasi ginen, eta antolatzaileei online emisiorako aukera eskaintzen.
  • Maiatzaren bukaeran, ikus-entzule gutxi elkartuta egin zitezkeen kultur ekitaldiak. Antolatzen hastea ez zen erabaki erraza. Ekainaren 5ean, bertso saioa antolatu genuen Amasa-Villabonan, segurtasun neurriak hartuta.
  • Ekainaren erditik aurrera, tokian tokiko zenbait antolatzaile animatu dira saioak antolatzera. Gailendu den formatua jaialdia izan da, eta beste plaza mota batzuk, otorduak eta plaza libreak, adibidez, desagertu egin dira.

Egoera hau izanda, Bertsozale Elkarteak bertso plaza bultzatzen jarri du indarra; antolatzaileei antolatzera animatu ez ezik, Bertsozale Elkarteak berak ere saioak antolatuz. Udazkenean, Chillida Lekurekin elkarlanean eta Euskal Sagardoa eta Getariako Txakolina jatorrizko deituren babesarekin, Bertsoa Sutan emanaldia eskaini genuen.

Plaza Biziberritzen_irudia