Ahalduntze Bertso Eskola

2015-2016 ikasturtean egin zen lehendabizikoz. Konpromisoan, esperimentazioan eta aniztasunaren oinarrien gainean egiten da lanketa. Bertsolarientzako ez ezik, gai-jartzaileentzako ere izan zen eskola 2019-2020 ikasturtean.

Bertsolaritzan emakumeak plazan izateak duen garrantziaz jabeturik, eta emakumeen jendaurreratzean ematen diren ezaugarri orokorrak kontuan hartuta, bertsolari bezala aurrera egin nahi duten emakumeentzat lagungarri izateko sortu zen Ahalduntze Bertso Eskola.

Aniztasunaren, konpromisoaren eta esperimentazioaren oinarrien gainean egiten da lanketa:

  • Aniztasuna. Adin, bertso maila, izaera, zein feminismoko ikuspegien arteko aniztasunari leku egitea. Horretarako, ahalegintzen gara zaintza talde dinamikaren oinarrian jartzen; zaintzaz ikasteko gune bat da.
  • Konpromisoa. Bertso-eskolan parte hartzeko eskatzen den baldintza bakarra da; ikasturtean zehar saioetara etorri eta bat-batean jarduteko jarrera hartzea.
  • Esperimentazioa. Ikasteko gune bat da, etengabeko bilakaeran ari dena, mugimenduan. Metodologia ere egokitzen joaten gara.
2020-2021 ikasturterako eman izena hemen!

2015-2016 ikasturtean egin zen lehendabizikoz eta geroztik ikasturtero egin da. Hilean behineko maiztasunarekin elkartzen da taldea, larunbat goizez, Amasa-Villabonako Subijana etxean (Euskal Herriko Bertsozale Elkartearen egoitzan). 2019-2020 ikasturtean, bertsolarientzako ez ezik, gai-jartzaileentzako ere izan zen Ahalduntze Bertso Eskola. 

2020-2021 ikasturtean ere, egoerara egokitzeko beharrezko neurriak hartuta, eskainiko dugu Ahalduntze Bertso Eskola. Parte-hartzaile kopurua murriztu behar dugunez, bertsolariei eskainiko zaie soilik oraingoan; dena den, pasa den urtean gai-jartzaileekin abiatutako bidean jarraitzeko, laster iragarriko dugu gai-jartzaileentzat espresuki sortutako eskaintza.

Irailaren 23tik (9:00etan hasita) urriaren 4ra arte eman ahal izango da izena webgune honetan bertan egokituko den izen-emate orria beteta. Urriaren 5ean emango da taldearen osaketaren berri; orduan bideratuko da ordainketa.

Hementxe, 2020-2021eko eskola egunen egutegia.

Ahalduntze Bertso-Eskola collage

Ibilbidea

Egitasmo honen sorrera bertso munduko emakumeen bi topaketei esker bideratu zen: 2013an, Artaunsoroko topaketan, emakume bertsolariek oholtzan jarduteko zituzten zailtasunak bistaratu ziren, eta 2014an, Askizuko topaketan, egoera horri erantzuteko lanketa gune bat sortzeko beharra azpimarratu zen. Hala, emakume bertsolarien plazaratzea sustatzeko asmoz, Bertsozale Elkartean erabaki zen ahalduntze prozesua bertsotan ere bultzatzea.

Halaxe sortu zen Ahalduntze Bertso Eskola: bat-batean egin nahi duten emakumeentzat, bertsolari bezala aurrera egiten laguntzeko. Espazio berri hori emakume bertsolarien parte hartzearekin diseinatu zen.

Orain arte egin diren bost edizioetan 43 lagunek hartu dute parte Ahalduntze Bertso Eskolan: gai-jartzaile lanetan Ainhoa Aranburu eta Arkaitz Goikoetxea aritu dira lehen lau edizioetan, eta bosgarrenean, Ainhoa Aranburu, Amaia Agirre eta Maite Berriozabal.

Hitzetik Hortzera (2020-01-12)