Sakanako Bertso Eguna maiatzaren 16an Irurtzunen
Goizean goizetik hasiko dira haurrentzako ekintzak. 11:30ean ezagutza jolasak egingo dituzte plazan, eta jarraian, 12:00etan, Scape Room-a izango da Atakondoa Ikastetxean. 13:00etan Sakanako gaztetxoen eskolarteko saioa egingo da, eta 14:30ean haurren bazkaria izango dute: entsalada, makarroiak eta postrea.
Arratsaldean ere ez da bertso giroa faltako. 18:15ean bertso poteo-kalejira egingo dute, eta 19:30ean merendola izango da Pikuxar Elkartean.
Helduentzat ere prestatu dute egitaraua. 13:00etan gaztetxoen eskolarteko saioa entzuteko aukera izango da, eta 14:00etan bermuta egingo da Irurtzungo eskolako fanfarrearekin. Ondoren, 15:00etan bertso bazkaria izango da, eta bazkalostean bertsotan ariko dira Ekhiñe Zapiain eta Xabat Illarregi.
Arratsaldeko bertso poteo-kalejira 18:15ean hasiko da, eta bertan kantuan ariko dira Julio Soto, Kattin Madariaga eta Eneko Lazkoz. Eguna borobiltzeko, 20:00etan DJ Boletus Rumberus ariko da musikarekin.
Egunean zehar joan-etorriak errazteko autobusa ere antolatu dute. 10:30ean abiatuko da Altsasutik, 10:40ean Etxarri Aranatzen egingo du geldialdia, 10:45ean Lakuntzako autobus geltokian eta 11:05ean iritsiko da Irurtzunera. Itzulera 20:15ean izango da Irurtzundik; ondoren geldialdiak egingo ditu Lakuntzan (20:30), Etxarri Aranatzen (20:35) eta 20:45ean iritsiko da Altsasura.
2025eko Sakanako Bertso Eguna