Bertsotan trebatzeko karta jolasak, prest!

2021/02/08
Sei karta sortez osatutako bilduma da. Eskaera egin zutenek datozen egunetan jaso ahal izango dute materiala.

Haurrek bat-batean egiteko karta jolasak atera ditugu Bertsozale Elkarteak eta Lanku Kultur Zerbitzuek. Bertso-eskoletan eta ikastetxeetan baliatzeko materiala da, eta elkarteko irakasle lantaldean sortu ditugu.

Bertso-eskola bakoitzari bilduma bana emango diogu opari; gainera, materiala ontzen ari ginela iragarri genuenean eskaera egiteko aukera eman genien ale gehiago behar zituztenei. Horiei guztiei datozen asteetan egingo diegu banaketa herrialdeetako Bertsozale Elkarteen bidez; jarriko gara bertso-eskolekin harremanetan, egoera zail honetan iristarazteko modurik egokiena topatzeko.

Karta jolasak, gainera, PDF fitxategian eskuragarri daude bertsoeskola.eus atarian, hemen.

Proiektuak Eusko Jaurlaritzaren laguntza jaso du.

Bertsotan bat-batean jarduteko

Sei karta sortez osatutako bilduma honek aukera emango digu haurrekin bat-bateko ariketa ezberdinak lantzeko: puntuari erantzutea (laguntza gisa oinak emanda), azken puntua eta oinak harturik kopla edo bertsoa osatzea, 4 edo 8 oinak emanda puntutan zein bertsotan egitea, gaiak sortzea (pertsonaiak, egoerak eta emozioak konbinatuz), errimatzen duten kartak lortu eta kantuan aritzea, eta pasa hitza jolasarekin asmakizunak igartzea.