Bizkaia

Izaskun Ellakuriaga kazetaria hil da

2025/07/17
Bertsozale, euskaltzale eta kulturzale amorratua, Euskal Herriko Txapelketa Nagusiko zein Bizkaiko Txapelketako komunikazio arduraduna izan zen, besteak beste.

Bizkaia Irratia piztu arren, ez da bere ahotsik entzungo. Izaskun Ellakuriaga Bustinza (Iurreta, 1972) zendu da. Kazetaritzan zein komunikazioan ibilbide luzea egindakoa da Ellakuriaga: Bizkaia Irratiko kazetaria zen eta Gerediaga Elkarteko komunikazio arduraduna izan da urte askoan, tartean, Durangoko Azokan. Horrez gain, ANBOTOren aurrekaria izan zen Eraz aldizkarian jardun zuen hainbat urtez erredaktore eta zuzendari lanetan; baita, Euskaldunon Egunakarian ere. Lekukomen sortzaileetako bat ere izan zen.

Bertsoari lotua egon da Ellakuriaga: gaztetan hasi zen bertsotan Jon Lopategirekin. Santi Belarrekin ere aritu zen Durangoko Bertso Eskolan Unai Iturriaga eta Igor Elortza kantukide zituela. Plazan ere kantatu zuen. Gerora, bertsoaren bestelako alorretan aritu da; bereziki, komunikazioan: 2008an Bizkaiko Bertsolari Txapelketako komunikazio arduraduna izan zen, eta 2009an Euskal Herriko Bertsolari Txapelketa Nagusikoa. Komunikazio Taldean boluntario moduan ere jarraitu zuen gerora. Herri mailan gai-jartzaietzan eta epailetzan ere ibili izan zen.

Kazetaritza lanean ere isla izan du bere bertsozaletasunak; besteak beste, Bizkaia Irratiko 'Zortziko Txikia' irratsaioa egiten zuen gaztetxoenekin. Bertsolari aldizkarian ere idazten zuen.

Eskerrik asko egindako behar guztiagatik, Izaskun!

Izaskun Ellakuriaga Zortziko Txikia irratsaioan, gaztetxoekin.