Twitter Facebook Instagram

Bizkaia

Bihar hasiko da Bertsolari Gazteen XXVIII. BBK Sariketa

2020/03/02
Martxoaren 2a eta 26a bitarte jokatuko da Bertsolari Gazteen XXVIII. BBK Sariketa

Gaur goizean aurkeztu da Bilbon XXVIII. Bertsolari Gazteen BBK Sariketea. Bihar, martxoaren 3an, izango da lehenengo kanporaketa Barakaldon, eta martxoaren 26an jokatuko da finala Bilbon.
Sariketa gaur goizean aurkeztu da Bilboko BBK Salan. Bertan egon dira Ione Narbaiza Bizkaiko Bertsozale Elkarteko eragilea, Juanjo Respaldiza Bizkaiko Ikastolen Elkarteko bertsolaritza arduraduna, Onintze Ituño BBKren ordezkaria eta Eneko Abasolo, “Abarkas” bertsolaria. Eurek eman dituzte aurtengo sariketari buruzko xehetasun guztiak.

Txapelketaren egitura
Bertsolari Gazteen BBK Sariketa taldekako txapelketa da, eta talde bakoitzean, gutxienez, sei kidek kantatuko dute, bi multzotan:

  • A mailan: 18 urtera arteko hiru bertsolari
  • B mailan: 19 urtetik 25 urtera arteko hiru bertsolari

Aurten ere, azken urteetan moduan, sei bertsolariko zortzi taldek hartuko dute parte, eta beraz, 55 bertsolari inguru arituko dira kantuan. Eskualde bakoitzak talde bat osatuko du, hurrengoak izango dira: Arratia, Busturialdea, Durangaldea, Enkarterri/Ezkerraldea, Hego Uribe, Lea-Artibai, Uribe-Butroe, eta Uribe-Kosta.

Bertsolari Gazteen BBK sariketaren ezaugarri nagusienetako bat taldeka jokatzen dela da. Hau da, taldekideen lana talde moduan baloratzen da eta saio bakoitzean puntu gehien batzen dituen taldeak egiten du aurrera.
Kanporaketa bakoitzeko talde irabazlea finalaurrekoetara sailkatzen da, eta finalaurreko bakoitzeko irabazlea finalera.

Saioz saio, finalera arte
BBK Sariketak aurreko urteetako egitura berbera edukiko du. Lau kanporaketa jokatuko dira lehenengo, finalaurreko bi gero, eta azkenik, finala.
Hurrengoa izango da egutegia:

2020-03-02 BBK Sariketa. Egutegia

Entzuleak ere, gazteak dira
Saio guztiak eskola-ordutegian egiten dira, beraz, ikusleak ikastetxeetan bertsolaritza lantzen ari diren ikasleak izaten dira. Dena dela, saioak irekiak dira, eta gura duena hurreratu daiteke.
Bereziki, finalera etortzeko gonbidapena luzatu dute antolatzaileek. Finala BBK Salan izango da martxoaren 26an, 18:00etan.

Denentzako saria
Talde izaera indartu eta elkarren arteko harremanak indartu guran, aurten ere, BBK Sariketako sari nagusia taldeko plan bat izango da. Finalistek garaikurrak jasoko dituzte, baina sari nagusia Txapelketan parte hartuko duten gazte guztientzako (bertsolari, gai-jartzaile eta epaile) egun osoko plana izango da.
Horrez gain, finalaren egunean, parte hartzaile bakoitzarentzako oparitxoa ere bananduko da eta aurten, gainera, kantakera onenaren saria ere egongo da.