Twitter ikonoa fb

Bizkaia

Atxuritik Bizkaia osora

2015/03/04
Atxuriko Garcia Rivero ikastetxeko ikasleek aniztasun funtzionalari buruzko bertsoak landu dituzte Bizkaia Irratiko Zortziko Txikia irratsaioan.

Arantza Plaza gidari, Garcia Rivero ikastetxekoek, gai sakonak eta esangura handikoak landu dituzte bertsoen bitartez. Gazteekin, sentsibilizazio beharra egin da, beraz, bertsoaren bitartez.

Seigarren mailako bi taldek ikasten dute astero astero bertsolaritza Atxuriko Garcia Rivero ikastetxean. Guztira, 51 ikasle batu ziren irratsaioaren grabaketa egunean.

Irratsaioan abestu zuten bertso sorta aniztasun funtzionala duten umeei buruzkoa izan zen. Idazten hasi aurretik, asko landu zuten gaia eta pozik gelditu ziren egindako lanarekin.

 

 

Ikasleek beraiek esan moduan “Ume guztiok ez gara berdinak. Batzuek eragozpen fisiko handiak dituzte. Baina pertsona moduan, geure modukoak edo hobeak dira.”. Beraientzat dira bada, bertsoak.

Errukia soberan

isilik garrasi

eskubide guztiak

ozen adierazi.

 

Maitasuna emanda

musu onak bota

sentimendua dute

nahiz indarra falta.

 

Isilik bizitzea

arazoa bada

keinuka hitz eginda

bat egingo gara.

 

Euskara, gaztelera

ingeles, frantsesa

gor-mutuen hizkuntza

ez da hain nekeza.

 

Saiatu behar dugu

guztiei laguntzen

gurekin denak pozik

ibili daitezen.

 

Arazo asko dute

baina jator beti

munduan jende askok

behar du erruki.

 

Guk zortea daukagu

gaixorik ez gaude

beste batzuk, ordea

zorte hori gabe.

 

Atxuriko umeak

gatoz gaur batera

gor-mutuei bihotzez

kaixo esatera.