Hitzetik Hortzera: Irabazi eta galdu

2023/01/26
Irabazi eta galtzearen artean dagoen bidearen artean ibiliko dira aste honetan Hitzetik Hortzeran. Jon Plazaola aktore eta umorista elkarrizketatuko dute “Irabazi” bere antzerki lana aitzaki hartuta. Horrez gain, Andoainen egindako Bertso Derbia eta Tolosaldeko Atariak urtero antolatzen duen saioko bertsoaldiak emango dituzte larunbat gauean ETB1en.

Realzale amorratua eta bertsozalea da Jon Plazaola urretxuarra. Nahiz eta gehienek bere aktore, umorista eta gidoilari lanagatik ezagutu. Gaur egun futbola gutxiago jarraitzen duen arren,  Realaren eta Athletic-en arteko derbi batean argi du zein talderen harmailetan kokatzen duen bere burua: Txuri-urdinean. 

Irabazi eta galdu

Irabazi antzerki lana sortu zuen Jon Plazaolak, berak idatzi eta antzezten du. Gizartean dagoen konpetentziari buruz, sare sozialetako idealizazioaz eta gure bertsiorik onena erakustearen presioaz aritzen da. Helburuak eta helmugak bideak baina gehiago balio duen pentsaraztera gonbidatzen du ikuslea Plazaolak. Baita galtzaileek egiten duten etengabeko bilaketa prozesuaz ere. 

Gidoiak eta proiektuak sortzerakoan, bizitzan bezala, umorea da bere ezinbesteko erreminta eta gertuko istorioak umoretik kontatzea gustatzen zaio urretxuarrari. 

Tolosako eta Andoaingo bertsoaldiak

Realaren eta Athletic-en gizonezkoen derbiaren aitzakian Andoainen egin zen aurtengo Bertso Derbia. Andoni Egañak egin zituen gai-jartzaile lanak eta kantuan aritu ziren Aitor Mendiluze, Amets Arzallus, Alaia Martin, Jone Uria, Sustrai Colina, eta Aitor Etxeberriazarraga. 

Tolosan berriz Leidor antzokia bete zuen Atariak. Tolosaldeko hedabideak urtero antolatzen duen saioan Amaia Agirreren esanetara aritu ziren Sustrai Colina, Amets Arzallus, Alaia Martin, Jexux Mari Irazu, Oihana Iguaran eta Nerea Ibarzabal.

Irabazi edo galdu, ez galdu larunbatean Hitzetik Hortzera gaueko 21:00tan ETB1en.

 

Jon Plazaola aktorea da Hitzetik Hortzerako gonbidatua.