Ekainaren 14an egingo da Euskal Herriko Eskolartekoa, Arantzan

Urtero bezala, ekainean egingo da Euskal Herriko Eskolartekoa. Aurtengoa XXXVII. edizioa izango da eta, iaz bezala, Nafarroan jokatuko da finala, Arantzan. Aurten goizez izango da saioa, 11:30etik aurrera.

Herrialde bakoitzean Eskolartekoak jokatzen ari dira Euskal Herrikoa iritsi orduko. Arabako, Bizkaiko, Gipuzkoako eta Nafarroako finalistak prest daude; eta Gazte Xilabaren finala ekainaren 7an izango da, Itsasun. Orduan jakingo dugu zeintzuk izango diren Euskal Herriko Eskolartekoan kantatuko duten finalistak.

Finala, goizez

Iaz ez bezala, aurten goizez izango da Eskolartekoa Arantzako frontoian. Saioa amaitutakoan mokadua eskainiko da eta sariak ere zozkatuko dira. Saiorako sarrera librea eta doakoa izango da.

Bertsozale Elkarteak eta Ikastolen Elkarteak antolatzen dugu gazteen bat-bateko bertsolari txapelketa, eta aurten ere Arantzako Udalaren laguntza izango du Euskal Herriko Eskolartekoak. Bertsozaletzea eta gazteei jendaurrean kantuan hasteko aukera ematea du helburu egitasmoak.