Xabat Illarregik irabazi du 2025eko Nafarroako Bertsolari Txapelketa
Nafarroa Arenan giro beroa egon da 2025eko Nafarroako Bertsolari Txapelketako finalean. 2.500 bertsozaletik gora elkartu dira bertan, zortzi bertsolarien lanari adi. Hain zuzen, lehen aldia izan da Nafarroako Bertsolari Txapelketako finala Nafarroa Arenan jokatu dena. 15:30ean ateak zabaldu, eta aulkiak betez joan dira bertsozaleak; 17:00etan igo dira oholtzara bertsolariak. Zozketak erabakitako ordenean aritu dira kantari bertsolariak: Ekhiñe Zapiain Arlegi, Eki Mateorena Zozaia, Julio Soto Ezkurdia, Saioa Alkaiza Guallar, Joanes Illarregi Marzol, Xabat Illarregi Marzol, Eneko Lazkoz Martinez eta Sarai Robles Vitas
Ariketaz ariketa lehenengo atala bete ostean, Illarregi anaiek lortu dute puntu gehien lortzea eta eurek kantatu dute buruz-burukoan. Azkenean, Xabat Ilarregik jantzi du txapela Sergio Barandiaranen eskutik 1205 punturekin.
Zehazki, horrela gelditu da finaleko sailkapena (ariketaz ariketako puntuazioa, hemen):
1. Xabat Illarregi Marzol_____________1205
2. Joanes Illarregi Marzol_______________1198.5
3. Saioa Alkaiza Guallar________________732
4. Julio Soto Ezkurdia__________________724.5
5. Eneko Lazkoz Martinez______________709
6. Sarai Robles Vitas___________________695.5
7. Ekhiñe Zapiain Arlegi________________666
8. Eki Mateorena Zozaia________________637
Gai-jartzaile lanetan Ainhoa Larretxea Agirre eta Ander Aranburu Arriola ibili dira. Zazpi epailez osatutako epaimahaia izan da bertsolarien lana epaitzeaz arduratu dena: Amaia Telletxea Larretxea, Cesar Etxeberria Saez, Jon Diaz de Mendibil, Joseba Beltza Bengoetxea, Mikel Beaumont Arizaleta, Nerea Bruño Artazkoz eta Patxi Barberena Urroz. Idazkari lanetan Ainhoa Goñi Castañares eta Nerea Goñi Begiristain aritu dira.
Hitzetik Hortzera berezia, bihar
Jarraipen handia izan du gaurko finalak; hainbat dira saioa zuzenean eman duten hedabideak, eta beste hainbat horren berri emateko akreditatu direnak. Hitzetik Hortzera telebista programak, esaterako, Nafarroako Bertsolari Txapelketako finalak emandako bertsoaldi onenak eta txapeldunaren hitzak bilduko ditu, bihar bertan, 15:00etan, ETB1n.
www.bertsoa.eus atariak, bestalde, finaleko bertsoaldien bideo hautaketa jasoko du, eta txapeldunari eta beste finalisteei egindako elkarrizketak ere argitaratuko ditu.
