<!DOCTYPE html> Errealitatea eta fikzioa nahastuko dira Aulki-Jokoaren eszenatokian — Bertsolari Txapelketa Nagusia 2017
Bertsozale.eus Bertsozale Elkartea

Errealitatea eta fikzioa nahastuko dira Aulki-Jokoaren eszenatokian

2017/12/08
Bertsotan askotan nahasten dira errealitatea eta fikzioa eta Aulki-Jokoan ere bai. Errealitateaz aritzen gara, baina antzerkia eginez gehienetan. Asteleheneko antzezlanak protagonista asko izango ditu: BECeko finalistak; Andoni Egaña, Sebastian Lizaso eta Maialen Lujanbio txapeldunak; Onintza Enbeita eta Nerea Ibarzabal kontu eta kantulariak; Jone Uria bertsolaria, eta Arkaitz Goikoetxea epailea. Hori guztia Edurne Azkaraterekin, astelehenean 22:30ean ETB1en.

Txapelketa Nagusiko finalaurrekoak amaituta, jakina da zein zortzi bertsolarik abestuko duten finalean: Aitor Mendiluze, Aitor Sarriegi, Amets Arzallus, Beñat GaztelumendiIgor ElortzaMaialen LujanbioSustrai Colina eta Unai Agirre igoko dira BECeko oholtzara. Beraiek izango dira astelehenean Aulki-Jokoa saioko protagonistak. 

Edurne Azkarate Andoniren Ganbaratik atera eta bertsoaren katedrala izan den Anoetako Belodromoan elkartuko da bi txapeldunekin, Andoni Egañarekin eta Sebastian Lizasorekin. 1986ean jantzi zuen txapela Lizasok eta Egaña lau aldiz izan da txapeldun Txapelketa Nagusian: 1993tik 2005era. Finala, finalaren aurreko sentipenak, bitxikeriak... asko dute kontatzeko biek, eta Edurne ez da galdetzeko gogoz geratuko. 

Aktore gehiago asteleheneko saioan

Bertsotan askotan nahasten dira errealitatea eta fikzioa eta ondo daki hori Maialen Lujanbiok; 2009an Bergaran Jon Martinekin osatutako bertsoaldia horren froga. Txapelketa Nagusian epaileen puntuek bilakatu dezakete fikzioa errealitate eta Arkaitz Goikoetxeak azalduko digu nola egiten duten lan epaileek. Nerea Ibarzabal eta Onintza Enbeitak bertsoaren errealitate dibertigarrira eramango gaituzte eta Jone Uriak zinematik hartutako bertso-doinua ekarriko digu. 

Hori guztia Aulki-Jokoa saioaren eszenatokian, astelehenean 22:30ean, ETB1en.

Nerea Ibarzabal eta Onintza Enbeita izango ditugu kontu kontari.