Bideak denontzat jartzen

2022/11/22

Bertsozale Elkartea kontzientziaz ari da lanean bere egitura eta egitasmoetan ikuspegi feminista txertatzeko. Pauso esanguratsuak eman dira azkenaldian norantza horretan. Oraindik ere bada zer urratu, eta lanean jarraituko dugu horretarako ondu ditugun tresnak iparrorratz hartuta.

Eraso matxisten kudeaketarako protokoloa

Emaginekoen aholkularitza lagun eta haiek prestatutako Elkarte eta kolektiboetan eraso matxisten kudeaketarako protokoloak egiteko gida abiapuntu hartuta, Bertsozale Elkarteak eraso matxistei aurre egiteko protokolo propioa osatu du. Taldean egindako eztabaida eta gogoeta prozesu baten bidez ondu da.

Plan feminista

Egituran nahiz egitasmoetan ikuspegi feminista txertatzeko plan feminista diseinatu du Bertsozale Elkarteak. Epe ertainean zein eszenatokitan egon nahiko genukeen zehaztuta, hara bideratuta lan egiteko plangintza da. Bertsozale Elkarteko egiturako hainbat kidek diseinatu dute proposamena, eta plana ekintzez osatzen dihardu prozesu baten bidez. Farapi Kooperatibak egin ditu aholkularitza lanak.

Topaketak

Bertsozale Elkarteak nahiz Lanku Kultur Zerbitzuak antolatzen dituen bertso saioetan askotariko ahotsei lekua emateko lanean ari gara etengabe. Azken urteetan plazako datuek erakusten dutenaren arabera, eta betiere irakurketa binariora mugatzen ari garela kontziente izanda, saio mota gehienetan, gizonen eta emakumeen partehartzea gero eta orekatuagoa da. Gainera, emakume bertsolari, gai-jartzaile, epaile eta bestelako eragileen ahalduntzerako topaketak antolatu izan dira Bertsozale Elkartetik, Bizkaiko Bertsozale Elkartean eta Nafarroakoan, kasu.

Txapelketan ere bai

Bertsolari Txapelketa Nagusia eraso matxistarik gabeko bertsoaren festa izatea nahi dugu. Saio bakoitzean gerta daitezkeen eraso matxistei erantzuteko puntu morea atontzen da informazio gunean bertan.

Harremanetarako: lantaldefeminista@bertsozale.eus