Bertsozale.eus Bertsozale Elkartea

Araba

Urtarrilak 24, Aramaio

Aramaioko Konde basoko iluek eta Izenbakuek

Bertso egunaren osteko nekeak gorputzetik askatuta, eta aurreko larunbatak herrian sortutako giroari tiraka, hogeita hamar lagun inguru bildu ziren Aramaioko Marixeka elkartean, afalosteko saioari adi. Konde basoko iluek taldeak irabazi zuen derbi aramaioarra, saioan Izenbakuek taldearekin aritu ostean.

 

Konde basoko iluek taldeak etxean hartu zituen Izenbakuek taldekoak. Arratsaldean hurbildu ziren elkartera, eta taldekideen artean prestatu zuten afaria. Afalosteko saioa hasteko, Aramaioko bertso-eskolako gazteek kuadrilari buruzko bertso-sorta eskaini zieten entzuleei: “Aitortzarena ideia txarra / izango zen beharbada,/ zeren ez dugu asko luzatu/ gure eskerren ilara… / Nahiz sarri izan gerrak, / kuadrillari eskerrak / egin dugu maiz algara…/ Gure alde txar ta alde onak/ baina asko maite gara”.

Etxeko taldetik, Xabi Igoa, Aitor Ugarte, Martin Abarrategi eta Paula Amilburu bertsolariak aritu ziren kantuan, eta gaiak jartzen, Lierni Altuna. Izenbakuek taldetik, berriz, Peru Abarrategi, Manex Agirre eta Danel Herrartek egin zuten bertsotan. Saio arina osatu zuten zazpi bertsolariek, tarteka Amaia Arregi eta Irati Lasaga trikiti doinuek lagunduta.

Hauek dira Aramaioko Bertso eskolako gaztetxoen taldeak kantatutako bertso idatziak:

Biztanle gutxi ditun herrian

Sortu ginenez mundura

Kuadrilla ere osatu gendun

Ahal genuen modura

Ta ordutik batera

Egin dugu aurrera

Ta omen gaude gustura

Baina egia aitortzeko be

Iada ordua heldu da

 

Berez gu beti gaude gustura

Ta kuadrillan lagun gara

Baina bakarrk pasa dut goiza

 Arratsaldea ta gaba

Eskolara heltzean

Beti bide ertzean

Eta patioan traba

Kuadrillari zerbait eskertzeko

Kuadrilla izan behar da

 

Askotan esan didate niri

Lar berba egiten dotela

Urpean sartzea be litzake

Horren ahalegin ergela

Maiz haserretzen dira

Benga isildu tira

Baina ezinezko dela

Kuadrillari eskertu nahi diot

Ni jasatea honela.

 

 

Ambiente ona nork jartzen duen

Ni horretan nauzu maisu

Ta horrelako laguna beti

Guztientzako da luxu

Ezin ezer eskertu

Behar didazu ulertu

Oraindik zorretan nauzu

Nire laguna izatea zuk

eskertu beharko duzu

 

erabakiak gure kuadrillan

ditu liderraren juntak

baina amargatu erreakzioak

ez dira beti arruntak

a zelako tristura

ni ez nago gustura

ta beti haienak kulpak

kuadrillari eskertzeko daukat

izan ditugun burrukak

 

aitortzarena ideia txarra

izango zen behar bada

zeren ez dugu asko luzatu

gure eskerren ilara

Nahiz sarri izan gerrak

Kuadrillari eskerrak

Egin dugu maiz algara

gure alde txar ta alde onak

baina asko maite gara

Argazkiak

Argazki gehiago

Albisteak

Umorea eta giro ona gailendu  dira Kuadrillarteko lehen asteburuan

Umorea eta giro ona gailendu dira Kuadrillarteko lehen asteburuan

2020/01/28

Aurrekoan ostiralean hasi zen 2020ko Arabako Bertso Kuadrilla Arteko Txapelketa. Lehen faseko 3 saio jokatu ziren Laudio, Korres eta Aramaion. Giro ederrean eta umorea protagonista izan zen saioetan, Errexala (Gasteiz), Kakiturriko Gladioloreak (Gasteiz) eta Konde basoko iluek (Aramaio) taldeak izan dira garaile saioetan.

Umorea eta giro ona gailendu dira Kuadrillarteko lehen asteburuan - Gehiago irakurri

Kuadrillartekoa Aramaio, Laudio eta Korresen hasiko da

Kuadrillartekoa Aramaio, Laudio eta Korresen hasiko da

2020/01/23

Aramaio, Laudio eta Korresen jokatuko dira Kuadrillarteko hasierako faseko lehen hiru saioak.

Kuadrillartekoa Aramaio, Laudio eta Korresen hasiko da - Gehiago irakurri

Arabako Bertso Kuadrilla arteko Txapelketa martxan dago

Arabako Bertso Kuadrilla arteko Txapelketa martxan dago

2020/01/18

Larunbatean, bat-bateko taldeen ordezkariek eta Arabako Bertsozale Elkarteak Arabako Bertso Kuadrillarteko Txapelketa aurkeztuko zuten Aramaion. Txapelketa formatua edukiko du 2020ko edizioak. Guztira 280 parte hartzailetik gora.

Arabako Bertso Kuadrilla arteko Txapelketa martxan dago - Gehiago irakurri

Fitxa

Eguna
2020/01/24
Ordua
20:30
Mota
Sailkapena
Herria
Aramaio
Tokia
Marixeka Elkartea