Bertsozale.eus Bertsozale Elkartea

Otsailak 1, Zalduondo

Lautadako ahuntzak eta Gorbeialdeko azkenak

D ligako lehen saioa, pasaden larunbatean, otsailak 1 jokatu zen Zalduondoko Zeledon Toki Elkartean. 14:00ak inguru gerturatu zen jendea elkartera, baina askoz lehenagotik zeuden han etxeko taldekoak. Sua egin, ekipoa montatu, mahaiak antolatu, bazkaria sukaldatu… Labearen azken momentuko baja ez zen arazoa izan sakramentuak prestatzeko. Izan ere, hotz handirik egin ez arren, bertso bazkarira gerturatu zirenek, babarrun goxoekin berotu zituzten barrenak.

 

Familia giroan bazkaldu eta gero, urduritasuna agertzearekin bat ekin zioten bertsolariek abesteari. Lehenik, idatzizko modalitateko Zalduon-Do Re Mix taldea aritu zen Rosaliari lapurtutako doinua Trikitixa eta klarinetearekin bertsionatuta. Horren ostean, bat-bateko saioaren txanda heldu zen. Lautadako ahuntzek ekipo fresko eta gaztea plazaratu zuten, lautadakoa ez zen fitxajeren bat eta guzti tarteko; Eider Adame, Oihane Perea, Aitor Najera, Markel Yoller eta Irati Anda. Gorbeialdeko azkenek ordea, esperientzia handiko taldea baliatu zuten norgehiagokan; Aitor Jiménez, Serapio López eta Unai Gomez. Saioa epaitzeko 3 kide egon ziren, elkarteko ordezkari bat eta talde bakoitzeko kide bat. Gai-emaile lanetan, neguko merkatuan lortutako azken momentuko fitxajea egon zen eta honekin batera, argazkilari lanetan, aspaldiko garaietan bertso eskolan ibilitako beste gazte bat. 20 bat entzule izan zituen saioak.

Bertso saioan aktualitateko gaiak jorratu ziren, hala nola, Coronavirusa, Zumarraundiko bidea eta aldaketa klimatikoa. Bertsolariek egin beharreko ariketak taldekako agurra, 8ko nagusia, 8ko txikia, puntuka, 4 oinak emanda, puntu erantzunak, bukaera emanda eta musikaz lagundutako koplak izan ziren. Gai gehienak umoretik hartu zituzten eta honek publikoaren barreak eragin zituen. Epaileen aburuz, Lautadako ahuntzak izan zen talde irabazlea.

Bertso eskolako gazteek lehen fila okupatu zuten eta adi-adi entzun zituzten bertso guztiak, egunen batean seguraski haiek hartuko dutelarik erreleboa. Duela urte batzuk bertso eskolan ibilitako jendea ere gerturatu zen, beraz hazia ereinda dago. Loratuko ote da?

Hau da Zalduon-Do Re Mix taldeko kideek prestatutako bertso sorta:

MARRONAZOO

(Txaloak)

Batzuk gaude batxillerren

ta besteak DBHn.

Kuadrillartekoa berriz

gabiltza errepikatzen.

 

Azeituna batzuk eman

eta engainatu gaituzte.

Lan egin behar genuela

hori ez genuen uste.

 

KAKA! MARRONAZO

 

Entsaioak prestatzen

Oihane dugu lehena.

Baina gero bera dugu

bertan agertzen ez dena.

 

Hemengo sukaldariek

ematen digute pena.

Babarrun txar triste batzuk

egiten admiten dena.

 

MARRONAZO KAKA! MARRONAZO

Epaile on bat daukagu

Egoitz zu salbatzen zara.

Oparitu puntu batzuk

edo joan pikutara.

 

Azkeneko hitzak ditugu

gure sorta amaitzeko.

Lautadako ahuntzei

ez dugu ezer eskertzeko.

 

MARRONAZO KAKA! MARRONAZO

Argazkiak

Argazki gehiago

Albisteak

Giro bikaina Kuadrillarteko bigarren asteburuan

Giro bikaina Kuadrillarteko bigarren asteburuan

2020/02/03

Larunbatean eman zitzaion jarraipena Kuadrillartekoari bi saiorekin. Bi saio jokatu ziren Zalduondo eta Gasteizen. Asteburu honetan ere umorea eta giro ederra nagusitu dira, Kuadrillarteko senari jarraiki. Lautadako ahuntzak (Zalduondo) eta Sumendiola bete poto (Gasteiz) taldeak izan dira garaile saioetan.

Giro bikaina Kuadrillarteko bigarren asteburuan - Gehiago irakurri

Arabako Bertso Kuadrilla arteko Txapelketa martxan dago

Arabako Bertso Kuadrilla arteko Txapelketa martxan dago

2020/01/18

Larunbatean, bat-bateko taldeen ordezkariek eta Arabako Bertsozale Elkarteak Arabako Bertso Kuadrillarteko Txapelketa aurkeztuko zuten Aramaion. Txapelketa formatua edukiko du 2020ko edizioak. Guztira 280 parte hartzailetik gora.

Arabako Bertso Kuadrilla arteko Txapelketa martxan dago - Gehiago irakurri

Fitxa

Eguna
2020/02/01
Ordua
14:00
Mota
Sailkapena
Herria
Zalduondo
Tokia
Zeledon Toki Elkartea