Ander Lizarralderentzat izan da Ormaiztegiko final laurdena

2015/11/01

Ormaiztegin jokatu da Gipuzkoako Bertsolari Txapelketako azkenaurreko final laurdena. Ander Lizarraldek lortu du lehen postua eta modu horretan finalaurrekoetarako txartela eskuratu du. Haren atzetik, Felix Zubia eta Iñaki Apalategi sailkatu dira, hurrenez hurren. 460 bertsozale elkartu dira Zubipe pilotalekuan. Hurrengo igandean amaituko da final laurdenetako fasea, Eskoriatzan jokatuko den saioarekin.

Ander Lizarraldek irabazi du Ormaitzegin jokatu den Gipuzkoako Bertsolari Txapelketako azkenaurreko final laurdena. Gaur lortu duen lehen postuari esker, oiartzuarra zuzenean sailkatu da azaroaren 22an Zarautzen jokatuko den finalaurrekotarako saiorako, Agin Laburu eta beste lau bertsolarirekin. Felix Zubiak eta Iñaki Apalategik egin dute, hurrenez hurren, bigarren eta hirugarren. 460 bertsozale inguru gerturatu dira herriko Zubipe pilotalekura.

BERTSOLARIA	PUNTUAZIOA
Ander Lizarralde Jimeno	501
Felix Zubia Olaskoaga	499
Iñaki Apalategi Astigarraga	498,5
Arkaitz Oiartzabal Agirre "Xamoa"	490
Unai Gaztelumendi Arandia	485
Maider Arregi Markuleta	444

Gipuzkoako Bertsolari Txapelketak hurrengo igandean izango du fase amaiera, Eskoriatzako kiroldegian jokatuko den azken final laurdenarekin. Sei bertsolari igoko dira oholtzara: Beñat Lizaso, Manu Goiogana, Mikel Artola, Oihana Iguaran, Unai Agirre eta Unai Mendizabal.

Ohi bezala, azken final laurdenerako sarrerak salgai daude www.bertsosarrerak.eus webgunean.

Ander Lizarraldek irabazi du Ormaiztegin.