Bertsozale gazte gipuzkoarren festa

2014/05/25
Gipuzkoako bertso-eskoletako ikasle ugari bildu dira Arrasaten. Maider Arregi oñatiarra da Gipuzkoako Eskolarteko txapeldun berria eta Maialen Akizu gailendu zen bertso jarrien modalitatean.

2014ko maiatzaren 25ean, Arrasaten, ospatu da Bertso Eskolen Eguna eta 250 haur izan dira parte hartzen. Gipuzkoako Eskolarteko bertsolari txapelketaren finala jokatu zen goizean eta arratsaldean jolasak prest zeuzkaten, bertsozale gaztetxoenen gozagarri.

Historikoa izan da igandeko zita, izan ere, aro berri baten hasiera markatuko baitu. Urtero antolatzen ziren Bertso Eskolen Eguna eta Eskolarteko Txapelketa , bakoitza bere aldetik. Aurten, ordea, lehenengoz egun berean  ospatuko dira. Hilabete luzetako gogoeten ondoren Eskolarteko txapelketari astinaldi bat ematea erabaki zen eta, parte hartzaileekin adostuta, proposamen eraldatua aurkeztu da aurten. 14 urtetik beherakoen lehiari uko egin zaio eta horren partez saio didaktikoak antolatu dira kanporaketatan. 14 urtetik 18 urtera bitartekoek txapelketa jokatzen jarraitzen dute. Bertso kopurua handitu da eta kanporaketen formatua modu informalago batean garatzen da orain.

Bertso eskolen eguna

Goizeko 10:00etan iritsi ziren autobusak eta kamiseten banaketarekin morez tindatu ziren Arrasateko kaleak. “Oinak buruan” leloa irakur zitekeen kamisetatan eta baita oholtza gainean ere.

Ondoren, Eskolarteko txapelketaren finala jokatu zen, bat-batekoa eta idatzikoaren sari banaketa.

Bazkalostean, Arrasateko gaztetxean Zirku tailerraz gozatu zuten haurrek eta 17:00ak alderako etxerako bidea hartu zuten berriz autobusean.

Eskolartekoaren finala

11:00tan hasi zen txapelketako saioa eta kanporaketatik sailkatutako zortzi bertsolariak aurkeztu zituen Amaia Agirre Gipuzkoako Bertsozale elkarteko irakasle eta bertsolariak-.

  • Iñigo Ibañez Aramendi
  • Amaia Urbieta Arruti
  • Iraitz Mateo Mugerza
  • Eneko Araiztegi Agirre
  • Maider Arregi Markuleta
  • Jon Gurrutxaga Urbieta
  • Aratz Igartzabal Bidegain
  • Paul Iruretagoiena Rezola

Zigor Leunda, Karlos Ibarguren, eta Maite Sukia izan ziren epaile lanetan eta idazkariarenean  Eneritz Artetxe.

Bat-bateko saioan  Maialen Lujanbio izan zen gai-jartzaile. 400 entzuleren bueltan  bildu ziren Amaia Antzokian.

Saio orekatua izan zen eta bertsolarien puntuazioak ere nahiko berdinduta ibili ziren X bertso kantatu ostean. Iñigo Ibañez izan zen bigarrena.

Honako ariketak egin zituzten bertsolariek:

  • AGURRAK
  • LAU OINAK EMANDA ZORTZIKO TXIKIAN
  • BINAKA ZORTZIKO TXIKIAN
  • BINAKA ZORTZIKO HANDIAN
  • BAKARKA: HASIERAKO PUNTUA EMANDA ETA GAIA EMANDA BERTSO BAT
  • BUKAERAKO AGURRAK

 

Maider Arregi iaz leku berean kantatu  zuen eta arantzatxoa iltzatuta geratu zitzaiola onartu zuen agurrean. Modurik onenean atera zuen Arregik,  Patxi Goikolearen eskutatik txapel preziatua jantziz. Gozo eta fin kantatu zuen saio osoan zehar oñatiarrak. Bukaeran, bere bertso-eskolakoei eskaini zien agurra.  Hona Goikolearen eta Arregiren amaierako bertsoak:

 

SARI EMAILEA:PATXI GOIKOLEA

 

Zortzi txapeldunetik

Maider lehena aurten

Non ta Arrasaten

Ohorez sentitu naiz

Txapel beltz hau janzten

Bertsoak borobilduz

Doinuz, neurri ta eten

Gaia ondo sakonduz

Hain ondo abesten

Txapeldunak zarete

Hitzekin jolasten.

 

MAIDER ARREGI

Oñatiarrez doia agurra

Baina ulertuko da lasai

Eskerrik asko animaittera

Etorri zain jente danai

Familixiai kuadrilliai ta

Pankartia in yozuenai

Bertso eskoliai bebai

Baina batez be Iñaki, gontzal

Ta urko nere anaiai

Ni ona naizen ez daukat argi

Baina onenak zuek zai!

Arregirena izan ziren saioko bertsorik onenetako batzuk. Lujanbiok  jarritako puntuari, adibidez, maisuki erantzun zion:

 

Arrasatera zatoz

Dotore jantzita

 

Hala janztean amak

Neri esan dit-ta

Herri hau nire ustez

Ez da hain polita

Ta nik ematen diot

Ederraren pinta.

 

Idatzizkoen sari-banaketak

Maialen Akizuk jaso zuen bertso-paper onenen saria helduenen mailan. Txapelketa honetako partaideei gai bat ematen zaie eta ordubete izaten dute zenbait bertso idazteko. Honakoak izan ziren idatzikoetako irabazleak:

LH3 ETA 4 (8-9 URTE)

Irabazlea: Sara Garcia Rubio (Ordiziako Jakintza ikastola)

Aipamenak: Eneritz Carcedo (Elgoibar ikastola), Aratz Lasa (Ataungo Joxemiel Barandiaran Eskola),  Leire Lizaso Uriarte (Zarauzko Salbatore Mitxelena ikastola), June Sudupe Beristain (Debako Luzaro Eskola)

LH5 ETA 6 (10-12 URTE)

IRABAZLEA: Aner Perez Manterola (Zarauzko Orokieta Herri Eskola)

Aipamenak: Antton Akizu (Soraluzeko eskola), Julen Medina (Urnietako Egape Ikastola), Aloña Salegi Alkorta (Debako Luzaro Ikastetxea), Uxuri Urrate Ibarzabal (Urretxu-Zumarraga ikastola)

DBH lehen zikloa (12-14 urte)

IRABAZLEA: Iker Letamendia (Azpeitiko Iraurgi ikastetxea)

AIPAMENAK:  Maddi Landa Etxabe (Zarauzko Salbatore Mitxelena ikastola), Araitz Sagarna (Oiartzungo Haurtzaro ikastola), Jone Narbaiza Martinez de Albeniz (Legazpiko Olazabala Institutua), Maddi Aiestaran Iparragirre (Beasaingo Loinazpe institutua)

 

DBH2. ZILOA ETA BATXILERGOA

IRABAZLEA: Maialen Akizu (Urretxuko Joxemari Iparragirre Institutua)

AIPAMENAK: Iraitz Mateo Gogorza (Errenteria-Oreretako Oiartzo ikastola), Iraitz Sarasola Lopetegi (Ordiziako Jakintza ikastola), Nagoa Agirre Arozamena (Urnietako Egape ikastola), Aratz Igartzabal Bidegain (Beasaingo Txindoki institutua)