Bertsozale.eus Bertsozale Elkartea

Bizkaia

Txapelketaren mezua

Egin kontu, bajatorku. Egin kargu, badakargu Bizkaiko Bertsolari Txapelketa 2016. Badatoz bertsolariak negutik udabarrira, ilunetatik argira, zabaldu daiten nahinora, ezker-eskoi, behera, gora, berbearen ohiartzuna, zer esana, zer entzuna.

Udabarriz indarbarriz jatorkuz bertsolariak, emon beharrekoak emotera, barrukoa kanpora ataratera. Prest dagoz salto egiteko, barrutik kanpora, jibotik oholtzara. Urliak salto arina… sandiak gora, jakina… eta berendiak hobe-ezina! Garunei eraginez, trinbili-tranbala, jomuga ipinita saio ideala.          

Bitartean bertsolariak txinboan zabuka dabiz, zabuan txinboka dabiz, dinbili-dantzan berben balantzan, pentsamentu-hausnarrean, euren eginbeharrean, txintxaunean zinburuka, aurreraka, atzeraka, sokari gogor helduta, hitzak gogoan hartuta.

Zibuan kulunka, kulunkan zibuka dabiz hitz-jolasak, berba-jokoak, hanka-luzeak, potoak, esan gura ta ezina, gozoa eta ozpina. Inguruan dihardue bertsozale, gaijartzaile, epaile, antolatzaile, kazetari, laguntzaile, babesle…, bakotxa berean behargin, lan isilean danak bardin.

Udagoienerako jauzia, ebatzi beharreko auzia: bata ez bada bestea, onena lehenestea, txarrena be onestea, hauxe da zuzenestea.

Finala urruntxo dago, beharbada askok gura baino urrunago, danez dala heltzekotan, kulunkau beharra dago.

Alkarlanari esker, saioka-saioka gainditu ahalko dogu aurtengo erronka, inoz egon ez daiten Bizkaian koloka bertsoari kulunka eusten deutsan soka.      

 

 

                                                                                         Joseba Etxebarria Uriarte