Otsailak 5, Narbaiza

Igandean, otsailak 5, jokatu zen B ligako bigarren saioa Narbaizako elkartean. Lautadako Egurrak eta Ezpalak taldeari tokatu zitzaion Gorbeialdea taldeari ongi etorria egin eta bazkari goxoa prestatzea ondoren bertsoei ekiteko. Itsaso eta mendiko paella goxoa daztatu zuten bertaratuek.

Tripa bete ondoren bertso idatziekin hasi zuten Narbaizan bertso jarduna. Zaballako bertso eskolatik ikusentzunezko formatuan bi sorta hunkigarri entzun eta kantatzeko aukera izan zen eta bertso idatziei ginda jarriz Aguraingo bertso eskolako Laia  eta Anek zuzenean kantatu zituzten haien bertsoak gitarraren eta kaxoiaren laguntzaz, santa eskea umorera ekarriz. 

Bapateko saioak eman zion segida bertso idatziei eta Matallica eta doinu tradizionalak nahastu ziren agurretan, metala eta egurra, haizkora eta guzti. Ez zen zauriturik egon, lasai. Ofiziotan Ricardo eta Oihane nagusian eta Irati eta Serapio ibili ziren txikian. Jarraian lau oinak eta azkena emanda Uxue eta Aitor izan genituen haien garunak estutuz. Saio erdia igaroa zen eta oraindik ez zegoen argi noren alde zegoen saioa. Bi Unaiak ibili ziren elkarren puntuei erantzunez, estilo ederrean biak ere, Andaren ziurtasun eta esperientzia Perearen lotsagabetasun eta freskotasunaren aurka, dotore. Puntukako saioan Narbaizako ama-semeak familia giroan puntuka entzutea ederra izan zen, Oier, Unai eta Oihane. Gorbeialdea hemen ere fin-fin. Koplatako saioan bertsolaririk gazteenak, Oierrek, zer nolako ezpala zuen erakutsi zien bertaratutakoei, harri eta zur utziz batzuk zein besteak. Baina oraindik ere balantza noren alde egon zitekeen antzik hartu gabe.

Patxi Aizpurua epaile neutrala iritsi zen epaiarekin eta...adi! Berdinketa! Kuadrillartekoaren historian gertatu den lehenbiziko berdinketa! Kopla txikian librean bost minutuz ibili ziren txandaka talde bakoitzeko Rikardo, Manu, Oihane eta Irati. Hemen ere bero-bero, erritmo bizian eta dotore. Eta balantzak norbaiten alde egin behar duenez, emozio guzti horren ondoren Gorbeialdeko bisitariek eraman zuten saioa etxera.

Aguraingo bertso eskolako gazteak:

Santa Ageda bezpera atzo

Eta gaur daukagu jaixa
Kuadrilarteko txapelketara
Ongi etorri Narbaiza

Oihane Perea, Oier ta Unai
Familia osoa kantari
Irati eta Uxue ere
Animoak lautadari

Gorbeialdea eta Lautada
Badago nahikoa pike
Kontuz zerk pikatzen zaitun eta
Gero bota afterbite

Santa Ageda bezpera atzo
Eta gaur daukagu jaixa
Kuadrilarteko txapelketara
Ongi etorri Narbaiza

Narbaizara ba etorri gara
Gorbeialdekoak ere
Guk ez daukagu lotsa gehiegi
Bertsotan gu gara trebge

Bertsolari hauek ez dira Rolex
Baino Casioa dago goai
Shakira ez bezala gu gaude
Oso pozik eta alai

Santa Ageda bezpera atzo
Eta gaur daukagu jaixa
Kuadrilarteko txapelketara
Ongi etorri Narbaiza