Kuadrillartekoa Aramaion, Agurainen eta Oionen

Ostiralean, D ligaren baitan, Ibabeko Bertaren bilobak (Aramaio) eta Alfreedo (Aiaraldea) taldeak arituko dira. 20:30 afari formatuan, Marixeka Elkartean Aramaioko taldea da antolatzaile. Aramaioko kantuzaleak taldea bertso sorta idatzia kantatuko du. Ibabeko Bertatren bilobak taldeak Ataurin eskuratu zuen lehenengo puntua.

Larunbatean, bi saio. Oionen, A ligan, Txandrio (Arabar Errioxa) eta Tribitu (Legutio) bat-bateko modalitatean. Bazkaldu ostean Azkenak Elkartean. Oingo Sanbi taldeak bertso sorta idatzia kantatuko du. Txandriok taldeak puntu bat eskuratu zuen aurreko asteburuan.

Larunbatean, Agurainen, E ligan: Ezustean eusten (Lautada) VS Errexala (Gasteiz).  Astorreka Elkartean bazkaldu ondoren arituko dira, baina lehenago bertso sorta idatzizko taldea.

Arabako Bertso Kuadrillarteko Txapelketa urtarrilaren 19an abiatu zen eta martxoaren 17an bukatuko da, Gasteizko Landatxo kantxan. 

Kuadrillartekoak Arabako bertso mugimendua bultzatu, indarberritu eta ikusarazi nahi du. Parte hartzaile guztien txapelketa izango da hau, lehia baino gehiago, gozamena izango da ardatz. Guztiaren oinarria auzolana da.

Arabako Bertsozale Elkartearen funtzioa koordinazio orokorra eta saretze lana izango da. Antolatzaileak txapelketan parte hartuko duten 14 taldeak dira. Bertsogintzako arlo teknikoan Arabako gai jartzaile taldea, epaile taldea eta Elkarteko lan taldearen laguntza izango dute.

Talde bakoitzak gutxienez 10-13 partaide izango ditu: gai jartzailea, epailea, hiru-sei bertsolari, kronista, argazkilaria, musikariak, sukaldariak.

Kuadrillartekoak hiru fase izango ditu:

-Lehen fasea: urtarrilaren 19tik otsailaren 4ra arte eta taldeak 4 ligatan banatu dira. 2 ligatan hiru taldekoak dira eta, beste biak, laukoak. Liga bakoitzetik talde bakarra sailkatuko da hurrengo fasera eta 2 sailkapenaren arabera.

-Finalaurrekoak: otsailaren 17an Araian, otsailaren 24an Amurrion eta martxoaren 3an Araian izango dira. Bakoitzean bi talde ariko dira lanean eta saio bakoitzaren irabazlea sailkatuko da finalera

-Finala: martxoaren 17an izango da, Gasteizko Landatxo kantxan.

Lehiarik gabe, saio guztietan, beste 17 bertso sorta taldeak arituko dira. Bertsoak aurretik prestatuta, papera eskuan kantatuko dute lehengo faseko saioetan eta finalaurrekoetan.