Hasi da Nazioarteko Inprobisatzaileen Bira

2018/10/10
Iruñean egin da lehen saioa eta inprobisatzaileak zein zaleak ezin gusturago geratu dira. Gaur Erandion izango da emanaldia.

Bete da Iruñeko Zentral. Aulki nahikorik ez eta zutik, aulki sailen atzean eta barra aldamenean jarri dira zaleak, oholtza ezkutatzen duen gortina beltzak zer azaleratuko ote duen zain. Kantuan aritzeko plaza ederra bilakatu da Zentral, eta erakustaldia egiteko gogoz aurkeztu zaizkigu payadore, repentista eta bertsolariak. Hasi da Nazioarteko Inprobisatzaileen Bira.

Kolore berde eta horiko oihalak goitik behera zintzilik; erdian bi besaulki eta atzean, aste honetan zehar batera eta bestera kantuan ariko diren inprobisatzaileak: Argentinatik etorritako Araceli Argüello payadorea, Kubako Tomasita Quiala repentista eta Julio Soto eta Maialen Lujanbio bertsolariak. Saioan barrena, batek eta besteak egiten duena adieraziz, gidatu gaitu Iker Iriartek. Entzun ditugu Araceli Argüelloren milonga gautxoak bere gitarrarekin, saioko lehen ofizioan ere bai Maialen Lujanbiorekin, Julio Soto dezimak eginez, eta Tomasita Quiala oin behartuen ariketa egiten Paco Rodriguez musikariaren konpainian. Zaleak parte hartzera ere gonbidatu ditu Quialaren ariketak, zortzi silabako esaldiak proposatuz. Inprobisatzaileen arteko komunikazioa ahalbidetzen, Irati Majuelo interprete lanak egiten. Zaleak gustora entzuten dutenarekin eta kantuan ari direnak ere bai izaten ari diren harrerarekin. Azkar pasa da denbora.

Amaitu da saioa, baina bihar egongo da beste bat; eta etzi bestea; eta ostiralean...igandera bitarte, egunero egokiera berri bat. Erandio, Hernani, Gasteiz, Baiona eta Donostia izango ditu geltoki birak, eta sarreradun saioetarako txartelak eskuragai daude jada: www.mintzola.eus atarian duzu informazioa.

Tomasita Quiala eta Julio Soto. / XDZ