Bertsotruken urtea, Bertsoan

2016/05/16
Bertso-eskolen artean gauzatutako egitasmoaren inguruko balorazioa egingo dute parte-hartzaileek sareko plazan. Era berean, Arabako Oholtzapetik egitasmoaren inguruko inpresioak ere bildu ditu.

Pasa den udazkenean Bertso Eskolen Egunak abiarazi zuen bertso-eskolen arteko Bertsotruk ekimena. Euskal Herri osoko 26  bertso-eskolek hartu dute parte eta ikasturtea amaitzear denean, atzera begirakoa eginez parte-hartzaileek balorazioa egin dute Bertsoan.

Araban egin berri duten Oholtzapetik egitasmoa ostiralean amaitu zen. Ikus-entzuleek erabakitako saio bakoitzeko irabazleak bildu ziren Legutioko emanaldian eta hango bertsoaldiak entzungai izango dira sareko plazan aste honetan; egitasmoaren lehen edizio honek utzitako inpresioak ere bildu ditu Bertsoak Asier Lafuenteren eta Oier Suarezen ahotik.

Eskolartekoa ere bete-betean da. Nafarroan eta Gipuzkoan bere bidea egin duen arren, Araban, Bizkaian eta Lapurdi, Baxenabarre eta Xiberoan aste honetan gauzatuko dira finalak: Araban eta Ipar Euskal Herrian larunbatean ospatuko dira eta igandean, Bizkaian. Horiek hurbiletik jarraituko ditu Bertsoak.

Bizkaiko Bertsolari Txapelketari eta Plazatik Gaztetxerari ere jarraipena egiten dihardu Bertsoak: aurreko saioetako bertsoaldiak eta datozen saioen xehetasunak iragarriko ditu. Entzungai izango dira baita ere, Abadiñoko saioan botatako bertsoak eta Xenpelar Dokumentazio Zentroaren laguntzaz berreskuratutako duela zenbait urtetako bertsoaldia ere.

Bertsoa, sareko plaza