Bertsoa eta literatura uztartuko dira igandeko Hitzetik Hortzeran

2017/03/02
Eider Rodriguez izango da aste honetako gonbidatua. Eider bera gidari zela, literatura gaitzat hartuta aritu ziren Maialen Lujanbio, Uxue Alberdi eta Ane Labaka Lasarte-Orian, trama formatuan. Hango bertsoaldi onenak ere eskainiko ditugu igandeko programan.

Azken urteotan saio batean baino gehiagotan uztartu izan dira bertsoa eta literatura. Lasarte-Orian egin zen azkeneko esperimentua, Eider Rodriguez gidari zela. Bera izango da igande honetako Hitzetik Hortzerako gonbidatua, eta saiorako egindako lanketaz gain literaturari lotuta dauzkan kezkak eta iritziak ere jasoko ditugu.

Lasarteko Xirimiri Elkartean gai-jartzaile eta tramagile lanetan aritu zen Eider Rodriguez. Maialen Lujanbio, Uxue Alberdi eta Ane Labaka izan zituen ondoan, berak prestatutako tramako pertsonaia bilakatuta. Prosa ederreko idazle kamutsaren paperetik aritu zen Ane Labaka; prosa traketseko idazle zorrotzarenetik Uxue Alberdi eta bien editore lanetan Maialen Lujanbio. Saioko bertsoaldi onenak bildu ditugu igandeko programarako.

Igogailuko eszena Tolosan

Bertsotarako gaien formatuan berrikuntza etengabea izan ohi da. Tolosan ere modu berezian jarri zien gaia Amaia Agirrek Sustrai Colinari eta Igor Elortzari: bideo bidez. Igogailu batean egindako esperimentu bat ageri zen bideoan: mutil bat neska bati kolpeak ematen ari zen, jendearen erreakzioak neurtzeko. Bideo gogor eta harrigarri horren inguruan sentiberatasun handiz aritu ziren bi bertsolariak hamarreko txikian kantuan.

Hori dena eta askoz gehiago igande honetan izango da ikusgai ETB1en, 15:00etatik aurrera. Eta laster interneten ere aurkitu ahal izango duzue EITB Nahieranen.

Eider Rodriguez idazlea izango da aste honetako gonbidatua.